3
4x11 jaor
vier ich vastelaovend!
In 1980 waerde ich prins biej de Kaketoes en maakte ich mien artiestedebuut
op ut podium. In 1983 waas mien opwachting as vorst biej De Veldjmuus en det
bin ich toet op de daag van vandaag nog sjteeds. Auch bin ich veurzitter van
De Veldjmuus en al 33 jaor veurzitter van de Samewirkende Remunjse Vastelaovend
(SRV). Regioveurzitter van de BCL en afgevaardigde van de Närrische Europese
Gemeinschaft (NEG) doon ich auch alweer ein tiedje.
De vastelaovend geit as eine rooie draod door mien laeve en det wil ich auch zo
haaie zolang ich ut fysiek aan kin. Veer höbbe helaas teväöl wisselinge in de vastelaovend.
In miene tied as vors höb ich waal ein kleine 75 vorste zeen vertrekke of
ergo ós zeen ontvalle. Dit geld auch veur veurzitters diej kómme en gaon.
De vastelaovend verangerd mit de daag en de mega-evenemente make ózze keltuur
kepot. De kleine evenemente sjneeje ónger omdet ut allemaol grootsjalig mót.
De vastelaovend dich biej hoes haaje op wiekniveau of dörpsniveau waert sjteeds
meer ein oetdaging. Vergeliek ut mit de supermért in de buurt dae mót kappe
omdét de klantje allein maar nao de grootgrutters gaon en allein as ze gét vergaete
zeen, aeve nao de buurtsuper gaon. As dae buurtsuper dan noodgedwónge de
deure sjluut is Limburg in nood. Dus roop ich alle luuj op óm de evenemente in eige
wiek en/of dörp in ere te haaie. Sjteun ózze vastelaovend en laot ut neet ter ziele
gaon. Zelf bin ich naeve De Veldjmuus al bienao dertig jaor same mit (BIG) Benny
Peters de organisatie van ut ut Internationaal Prinsetreffe. Auch ut BCL Treffe 2024
zal mede in ós hénj ligke. Blauwe Maondaag en de ontvangs in ut sjtadhoes loupe
auch al ruim drieëndertig jaor via mich. Dus nog zat werk naeve mien Veldjmuus en
de BCL verplichtinge. Ich blief ut mit leefde doon zolang ‘Ozze Leeve Heer’ mich
mit rös leut. Ich wins alle veurgéngers in Limburg maar zeker in Remunj hil väöl
sjpas en geneet van elk mement.
GROOTVORS Dré.
PS…in 1990 maakte zich väöl luuj drök om mien beneuming as grootvors. Noew löp
der al ein ganse batteriej aan Grootvorste róndj. Det geld auch veur de Wienkeuninginne.
De veertigste moog ich in 2024 oetrope. Det waerde in ut begin genegeerd
maar noew zeen der sjteeds meer vereniginge diej gezeen höbbe det vrouwe ein
toegevoegde waerde höbbe in ózze vastelaovend. Geweldig toch.
44